चंद्रपुरात आंतरराष्ट्रीय दर्जाच्या क्रीडा सुविधा विकसित होत असून, ‘मिशन ऑलिम्पिक’ हे ध्येय समोर ठेवून साडेपाच हजार प्रेक्षक क्षमतेचे वातानुकूलित स्टेडियम, बॅडमिंटनची दहा कोर्ट्स आणि एआय आधारित धनुर्विद्या केंद्र उभारण्यात येत आहे.
या आधुनिक सुविधांच्या माध्यमातून चंद्रपूरच्या खेळाडूंना राष्ट्रीय आणि आंतरराष्ट्रीय स्तरावर चमकण्याची संधी मिळावी, हा या मागचा उद्देश आहे. युवकांनी मोबाईलच्या स्क्रीनपासून मैदानाकडे वळावे, मेहनतीच्या बळावर आकाशाला गवसणी घालावी आणि देशासाठी पदके जिंकून चंद्रपूरचा नावलौकिक उजळवावा अशा प्रकारची भावना आमदार सुधीर मुनगंटीवार यांनी व्यक्त केली.
ते चंद्रपूर जिल्हा बॅडमिंटन डेव्हलपमेंट असोसिएशनच्या वतीने आयोजित स्व. डॉ. सच्चिदानंद मुनगंटीवार यांच्या स्मृतीप्रीत्यर्थ आयोजित महाराष्ट्र ज्युनिअर (अंडर १९) आंतरजिल्हा व राज्य बॅडमिंटन अजिंक्यपद स्पर्धा २०२६ चा उदघाटनाप्रसंगी जिल्हा स्टेडियम येथील बॅडमिंटन हॉलमध्ये आले होते . या दरम्यान त्यांनी खेळाडूंना संबोधन केलं .
